Адамзаттың алдына қойылған ұлы парыздардың бірі – Жаратушысын тану, тек Алласын таныған адам ғана оның бұйрықтарына бойұсынып, заңымен жүретін болады. Төмендегі ғибратты әңгіме әрбір адамның ойындағы күдік пен күмәнға нүкте қоя алады деп сенеміз.

      Күндердің күнінде Құдай жоқ деп таныған атеистердің бірі имам Әбу Ханифаға (р.х) келіп Жаратушы жайлы сөз таластырмаққа бел буады. Оның сондағы қойған бірінші сауалы мынау екен:

- Сенің Раббың қай уақытта, қай жылы пайда болған? Сонда имам:

- Алла уақыт пен заманнан бұрын бар болған. Болуының басы жоқ, - дейді. Атеист:

- Сонда қалай? Мысал келтірші! - дейді. Әбу Ханифа:

- Төрттің алдында не бар? - деп сұрайды. Ол:

- Үш - деп жауап береді. Имам:

- Үштің алдында не бар? - деп сұрайды. Ол:

- Екі - дейді. Имам:

- Олай болса, екінің алдында не бар? - деп сұрайды. Ол:

- Бір - дейді. Имам:

- Ал, бірдің алдында не бар? - деп сұрайды. Ол:

- Ештеңе жоқ - деп жауап береді. Сонда Әбу Ханифа:

- Егер біз білетін қарапайым бірдің алдында ештеңе жоқ болса, әуелден бар, ақиқи жалғыз, дара, бір болған Алла жайлы не ойлай алмақсың?! - дейді.

     Атеист сонда да қанағаттанбастан:

- Ал Раббың қай жаққа қарап тұр? - деп сұрайды. Әбу Ханифа:

- Қараңғы жерде жағылған шамның нұры қай тарапқа қарайды? - деп, қарсы сұрақ қояды. Ол:

- Оның нұры барлық жаққа тарайды, - дейді. Сонда имам:

- Бұл адам қолымен жасалған нұрдың жағдайы, ал ешқандай ұқсасы жоқ, бақылауы мен білімі барлық нәрсені қалт жібермей қамтып тұрушы, аспандар мен жердің Нұры болған Алла жайлы не ойлай алмақсың?! - дейді.

     Сонда әлгі құдайсыз тағы да өңмеңдеп:

- Онда Раббыңның болмысы жайлы әңгімелеп берші. Ол темір секілді қатты ма? Әлде су секілді сұйық па? Не түтін, ауа секілді газ ба? - дейді. Сонда имам еш саспастан:

- Жан тәсілім етейін деп жатқан адамның қасында болып па едің? - дейді. Ол:

- Иә, болдым, - деп жауап қатады. Имам:

- Ол қайтыс болғаннан кейін сөйлеп, қозғала ала ма? - деп сұрайды. Ол:

- Жоқ, - дейді. Имам оған:

- Неге олай? - дейді. Ол:

- Оның жаны шығып кетеді ғой! - дейді таңдана. Сонда имам осы жерден шап беріп:

- Маған сол шыққан жанды сипаттап берші. Ол темір секілді қатты ма? Әлде су секілді сұйық па? Не түтін, ауа секілді газ ба? - дейді. Атеист:

- Ол жайында еш нәрсе білмеймін, - деген екен. Сонда имам:

- Жаратылған рух жайлы білімің жоқ, Жаратушы Ұлы Алланың заты жайлы қалай сұрап отырсың? Мен оған қалай жауап бермекпін?! - деген ұтқыр жауабын айтады.

Расымен де, көмес пен көрнеуді Білуші, көктер мен жердің Жаратушысы, барлық нәрселердің Раббысы әрі Патшасы болған Алланың заты, болмысы, сипаттары туралы қорытынды шығаруға біздің санамыз жетпейді, алайда, біздің қолымыздан оған алғыс айту, құлшылық ету келеді. Қайырымды құл болуға асығайық!