Алматы қаласындағы Сейфуллин даңғылы мен Радищев көшелерінің қиылысында бес күні бойы тегін тамақ беретін асхана ашылды. «Уақып» деген атауды иемденген бұл асхана 

күн сайын әлеуметтік тұрмысы төмен 100-120 адамды тегін тамақтандырады. 

Қазақстан Мұсылмандары діни бас­қар­масына қарасты Алматы қаласының Орта­лық мешіті және қолы ашық, қайырымды жандардың ұйытқы болуымен ашылған асхана жыл бойы тегін қызмет етуді жоспарлап отыр. Ұйымдастырушылардың айтуынша, «Оң қолың берген садақаны сол қолың білме­сін» дегендей, демеушілер өз аттарының құпия болғанын қалаған.

–  Орталық мешітке әлеуметтік аз қамтылған, жағдайы нашар, жалғызбасты аналар, жетімдер, мүсәпірлер, тағдырдың тауқіметімен қиындық көріп жүрген жан­дар келіп тіркеліп, түрлі әлеуметтік көмек алып тұрады. Соның бәрі мешіттің жанын­дағы «Ықылас» қайырымдылық қорына тіркеледі. Міне, асханадан осындай жандар тамақтана алады. Күніне бір кірген адам екінші немесе үшінші рет тамақтануына болады, – дейді Орталық мешіттің наиб-имамы Ермек Көкірекбаев.

«Асхана қазіргі таңда 7-8 адамды жұмыспен қамтып отыр. Олар ай сайын өздеріне тиесілі еңбекақысын алады. Сондықтан әлеу­меттік көмекке мұқтаж таныс не көршілеріңіз болса, оларға осы мекенжайды айта жүрсеңіздер болады», – дейді Орталық мешіт қызметкерлері.